ما يُستفـاد

سمعت فالراديو واحد السيد كيهدر على شي ربيع كيضرّ الفلاحة، وشرح كيفاش كينبت وأنه كيعيش وخا بلا ما. من بعد قال: "خوتي الفلاّحة، غدا نعرفو كيفاش يمكن التخلص من هاد العشب اللي كيضر الشمندر (!)" يعني دابا ليلة كـاملة زائد نهار غدا غيبقى الشمندر كيتكرفس من نبتة طفيلية حتـى يجي ف العشية السيد على خاطرو يشرح فالبرنامج طريقة الوقاية. وطبعا ديك الساعة غيكون طاح الليل، يعني عاود حتى صباح الخميس عاد يخرج الفلاح مسكين يطبق النصيحة اللي سمعها فالإداعة. شنو هاد الشي دابا؟ (2016)

شحال هادي كان طونيك كبير وبدرهم، ياك؟ دابا صغّروه حتى قرّب يختفي وما زال بنفس التمن. الناس ديال بيمو شافو إدا خلاو الحجم القديم وزادو التمن، غادي نقولو "غلاّوه". كدلك رايبي: صغير وبنفس التمن. طبعا المتضررين من هاد الشي هوما الدراري الصغار، اللي قابلين بحجم طونيك كيف ما هو دابا حيت ماعرفوش كيف كان من قبل. (وهنا يغيب دور الآباء ف التوعية ) المهم أن فرض الأمر الواقع أسهل حاجة بالنسبة للسلطة والشركات: الكبار ف السن واللي عاقلين على شحال هادي كيولفو الوضع الجديد، والجيل اللي طالع عندو هانية حيت ما عندوش إمكانية المقارنة. محاولة بالدارجة، وقبلو علينا وصافي.